Göyçayda Debat proqramının nəticələri
Göyçay İnkişaf Mərkəzi" İctimai Birliyi (İB) Almaniya Xalq
Universitetləri Birliyinin və "British Council"in maliyyə dəstəyi ilə
Göyçay rayonunda reallaşdırdığı "Gənclərin sosial həyata inteqrasiya
edilməsində imkanların artırılması" layihəsi çərçivəsində Göyçay Debat
Proqramının yekun turniri keçirilmişdir. Dünən Göyçay şəhərindəki 1 nömrəli orta məktəbdə təşkil edilən
turnirdə orta məktəblərin "Qarabağ", "Qələbə", "İnvisible", "Gənclər",
"Gənclər α", "Zəka", "GSM", "Drakon", "Qartal", "Delta" və "Zirvə"
komandaları iştirak etmişlər.
"Uğurlu karyeranın qurulması düzgün
ixtisas seçimindən asılıdır" mövzusu üzərində qurulan turnirdə şagirdlər
araşdırma və təşkilatçılıq, dinləmək, qeyd aparmaq və fikir yürütmək,
cəmiyyət qarşısında sərbəst çıxış etmək və natiqlik sənətini inkişaf
etdirmək bacarıqlarını göstərmişlər. Finalda ən yaxşı nəticə göstərmiş
şəhərdəki 2 nömrəli məktəbin "Zəka" komandası qalib olmuşdur. Komandaya "Göyçay İnkişaf Mərkəzi" İB-nin kubok və medalları verilmişdir. Sonda
rayon gənclər və idman idarəsinin rəisi Elşən Şirinov, "Göyçay İnkişaf
Mərkəzi" İB-nin sədri Əzizağa Atakişiyev, "Vətəndaş Cəmiyyətində Debat"
İB-nin direktor müavini Seymur Hüseynov gənc debatçıları təbrik edərək
onlara uğurlar arzulamışlar. Bütün komandaların üzvlərinə sertifikatlar təqdim olunmuşdur. Xatırladaq
ki, Göyçay Debat Proqramı Gənclər və İdman Nazirliyinin, "İrəli" və
"Vətəndaş Cəmiyyətində Debat" İB-lərinin dəstəyi ilə keçirilmişdir.
Könül Aypara